ऑनलाइन मटका चालवणाऱ्यांवर पोलीसांची कारवाई !

नेरळ ( आनंद सकपाळ )

रायगडमध्ये सर्रास चालणाऱ्या मटका जुगाराच्या अड्ड्यावर पोलीस अधिक्षक आंचल दलाल यांनी चाप लावला. मात्र तरीही गुपचुप ऑनलाईन पध्दतीने मटका सुरू असल्याची माहिती पोलिसांना मिळाली. तेव्हा थेट कारवाईचा बडगा उगारत मटका चालवणाऱ्या तिघांच्या नेरळ पोलिसांनी मुसक्या आवळल्या आहेत. या नेरळ पोलिसांच्या कारवाईमुळे इतर ऑनलाईन मटका जुगार चालविणाऱ्यांचे धाबे चांगलेच दणानले आहे.
रायगड जिल्हा पोलीस अधीक्षक आंचल दलाल यांनी रायगड जिल्ह्याचा कार्यभार स्वीकारल्यानंतर तत्काळ त्यांनी अवैध धंद्यांवर चाप लावला. त्यांच्या आदेशानुसार जिल्ह्यातील अवैध धंदे बंद झाले आहे. तरीसुद्धा जिल्हयात काही ठिकाणी पडद्यामागे हे गैरकृत्य व सध्या ऑनलाईन पद्धतीने मटका जुगार हा मोठ्या प्रमाणात चालविला जात असल्याची सुरू असल्याची चर्चा सुरू होती. तर नेरळ पोलीस ठाणे हद्दीत असे ऑनलाईन मटका जुगार सुरू असल्याची माहिती ही नेरळ पोलीस ठाण्याचे पोलीस निरिक्षक शिवाजी ढवळे यांना गुप्त बातमीदाराकडून मिळाली. त्यामुळे नेरळ पोलिसांनी कारवाईचा बडगा उगारात दि.०८ नोव्हेंबर रोजी दुपारचे १.४५ वाजण्याचे दरम्यान नेरळ येथील गणेश घाट परिसरात राजमाता जिजाई तळावाजवळ ऑनलाईन मटका जुगार चालविणाऱ्या तिघांना ताब्यात घेतलं आहे. यात १) यशवंत जाणू निरगुडा वय वर्ष ३२, रा. टपालवाडी, २) अजय देहु शिंगवा वय वर्ष ३३, रा. आनंदवाडी, ३) अनिल धोंडू आखाडे रा. भडवळ, ता. कर्जत यांना ताब्यात घेऊन त्यांच्या विरोधात नेरळ पोलीस ठाण्यात महाराष्ट्र जुगार प्रतिबंध कायदा १८८७ अंतर्गत गुन्हा दाखल करण्यात आला आहे. या दरम्यान या तिघांच्या ताब्यातून एक १३ हजार रुपये किंमतीचा मोबाईल 2 हजार रुपये किंमतीचा एक पांढऱ्या रंगाचा मोबाईल जप्त करण्यात आला आहे. सदर गुन्ह्या प्रकरणी नेरळ पोलीस ठाण्याचे पो.ना साळुंखे यांनी फिर्याद दाखल केली आहे. तर पुढील तपास हा पो.ह.वा. वाघमारे हे करीत आहेत.

No Result