शाळा सोडल्याच्या ५० वर्षानंतरही मित्रमैत्रिणींची भेट

नेरळ : ( दीपक पाटील )

शाळेतले दिवस प्रत्येकाच्या आठवणींचा एक महत्वाचा भाग असतात. शाळेतल्या गमतीजमती, तेव्हाचे शिक्षक, अभ्यास आणि मित्रमैत्रिणी या सगळ्या गोष्टी काळानुरूप आठवणी बनून राहतात नंतर मात्र प्रत्येक जण करिअर, संसार अशा जबाबदाऱ्यांमध्ये गुंतत जातो. मात्र शाळेतील सवंगड्यांची आठवण कायम असते. दरम्यान एस.एस.सी. देऊन ५० वर्ष पूर्ण झाल्याने नेरळ विद्या मंदिर या शाळेतील सन १९७५- ७६ या शैक्षणिक वर्षात इयत्ता १० वी तुन उत्तीर्ण झालेल्या सर्व मित्र मैत्रिणींचे स्नेहसंमेलन आयोजित करण्यात आले. यानिमित्ताने शाळेतील जुन्या आठवणींना उजाळा देण्यात आला.

नेरळ विद्या मंदिर या शाळेतील सन १९७५- ७६ या शैक्षणिक वर्षात इयत्ता १० वी देऊन हे ५० वे सुवर्ण महोत्सवी वर्ष असल्याने ते सदैव आठवणीत राहावे म्हणून कोअर कमिटीच्या सभासदांनी मागील दोन महिन्यांपासून मनापासून प्रयत्न सुरु केले होते. त्याला यश येऊन दिनांक ५ डिसेंबर रोजी नेरळ येथील सुमन फार्म येथे स्नेहसंमेलन आयोजित करण्यात आले होते. यावेळी ५० वर्षानंतरही ४१ सदस्य हजर होते. त्यात अहमदाबाद, जळगाव, पुणे येथूनही सदस्य आले होते. ५० वर्ष हा आयुष्याचा खूप मोठा कालावधी व्यतीत होत असतांना यात अनेक मित्र मैत्रिणींनी या जगाचा निरोप घेतला असल्याने जे हयात आहेत त्यातील बहुतेक सर्वांनी कार्यक्रमास उपस्थित राहावे म्हणून कमिटी कडून खूप प्रयत्न केले गेले त्यास मोठ्या संख्येने उपस्थित राहून इतर सदस्यांनी प्रतिसाद दिला.

READ ALSO

टाटा पॉवरचे जनसेवेसाठी महत्वाचे पाऊल

24/04/2026

कर्जतमध्ये होणार भारतातील सर्वात मोठी विद्यार्थी-केंद्रित चॅरिटी रन ‘कन्‍याथॉन २०२६

06/03/2026

यावेळी दीप प्रज्वलीत करून व राष्ट्रगीत गाऊन कार्यक्रमाची सुरुवात करण्यात आली. आलेल्या सर्वांना गुलाब पुष्प देऊन त्यांचे स्वागत करण्यात आले. त्या नंतर या ५० वर्षाच्या प्रवासात जे शिक्षक, मित्र, मैत्रिणी हे जग सोडून गेल्या आहेत. त्यांना दोन मिनिटे स्तब्ध उभे राहून श्रद्धांजली अर्पण करण्यात आली.

आपण सर्वांनी वर्षातून किमान एक दिवस भेटावे एकमेकांची ख्याली खुशाली विचारावी, गप्पा गोष्टी कराव्यात आणि एक दिवस स्वतःसाठी आनंदाने खर्ची घालावा या उद्देशाने दिनांक २६ जानेवारी २०१३ पासून प्रत्येक वर्षी नियमित एकत्र भेटत आहोत. या ही वर्षी आपण भेटत आहोत याची आठवण प्रास्ताविक करतांना कुंदन मरे यांनी सर्वांना करून दिली. त्यानंतर अनेकांनी मनोगत व्यक्त करतांना मागील १३ वर्षात कोअर कमिटीच्या सदस्यांनी जी मेहनत घेतली त्याचे कौतुक केले. अनेकांनी जुन्या आठवणींना उजाळा दिला. त्यानंतर उपस्थितांनी दुपारी सुग्रास भोजनाचा आनंद घेतला. भोजनानंतर हिंदी, मराठी गीतांचा कार्यक्रम झाला. त्यानंतर सर्वांना सुवर्ण महोत्सवी वर्षानिमित्त स्मृती चिन्ह देण्यात आले. तसेच वर्ग मैत्रीण रत्ना बागलवाडी यांनी खूप सुंदर कप भेट म्हणून आणले होते त्यांचे वाटप करण्यात आले. संध्याकाळी सर्वांनी चहा घेतल्यानंतर पुढील वर्षी पुन्हा भेटण्याचा संकल्प करून कार्यक्रमाची सांगता झाली.

कार्यक्रमासाठी सुर्यकांत चंचे, नारायण नाईक, कुंदन मरे, अरविंद पतंगे, सुधाकर देसाई, आयुब तांबोळी, दिनेश पाटणकर, ज्योती चवाथे या कोअर कमिटी सदस्यांसह नयना बदले, तारा सोलंकी, शांता कराळे, नीलिमा गंध्रे, मीनाक्षी बोरामणीकर, अलका शहा, नीरा मोडक, सुरेखा घाटपांडे, जानकी कटारिया, रत्ना बागलवाडी, आरती बेलसरे, जयश्री शहा, सरला सिंधी, मेघा जोगळेकर (पती विवेक यांच्या सह), विद्यारण्य क्षीरसागर, शांताराम तरे, हरिचंद्र खडे, यशवंत दाभणे, मल्लेशा कन्हैया, तानाजी मोहिते, सुरेश कुंभार, अरविंद देवकर, रवींद्र गायकवाड, चंद्रकांत कदम, नारायण घरत, मोहन पाटील, अकिल पालटे, दत्ता निमणे, कमलाकर जाधव, गिरीश बदले, भालचंद्र मसणे, मुकुंद काळे, नागेश निमणे, हे सदस्य उपस्थित होते.